19 маусым, Сәрсенбі

Садриддин Ахмедовтың қарсыласы туралы не білеміз?

Google+ Pinterest LinkedIn Tumblr +

24 наурыз күні «Алматы арена» спорт кешенінде өтетін бокс кешінде бірнеше қазақ боксшылары сынға түседі. WBC тұжырымы бойынша жастар арасында әлем чемпионы Садриддин «Қазақ сарбазы» Ахмедов бұл кештің басты жекпе-жегінің бірінде сынға түседі. Қазақ боксының жарқын болашағы саналатын Садриддин индонезиялық боксшы Джон «Yohanes Ruba» Рубамен (17-5-1, 9КО) қолғап түйістіреді. Осы орайда, отандасымыздың қарсыласының кәсіпқой бокстағы жетістіктері мен әлеуетін бағамдап көрдік.

– Джон «Yohanes Ruba» Руба 1993 жылы Индонезияның Сесо қаласында дүниеге келген. Кәсіпқой бокстағы алғашқы жекпе-жегін 2013 жылы өзінің отандасына қарсы өткізіп, төрешілер шешімімен жеңген. Алғашқы 4 жекпе-жегінде жеңіске жеткен Руба бесінші кездесуінде жеңіліске ұшырайды. Дегенмен 6 жекпе-жегінде Индонезияның чемпиондық белбеуін жеңсе, 7 кездесуінде Индонезияның IBA ATI титулына ие болады. Осы екі белбеуден кейін WBC тұжырымы бойынша жастар арасында әлем чемпионы атағына таласып, жапондық Маруки Юсикеге есе жіберген. Руба он тоғызыншы жекпе-жегінде WBC Asia чемпиондық белбеуін жеңген. Бірақ қытайлық қандасымыз Бейсен Нәсиоллаұлыға қарсы өткізген жекпе-жегінде 8 раундта техникалық нокаутпен ұтылып, чемпиондық белбеуін қорғай алмаған. Индонезиялық боксшы соңғы жекпе-жегін 2018 жылдың қараша айында өткізген.

Айта кетейік, Садриддин Ахмедов кәсіпқой бокста 7 кездесу өткізіп, барлығында қарсыластарын нокаутқа жіберген болатын. Ол соңғы жекпе-жегін Канада елінде өткізіп, мексикалық Абрахам «Питбуль» Хуаресті (13-1-0, 5 КО) 4 раундта нокаутқа жіберген болатын.

Бөлісу

.