Ережесіз жекпе-жек

Ержан Естанов: Қазақстанда тек жеңілгеніңді айтады

Отандасымыз алдағы Fights Nights Global 86 турнирінде Расул Мирзаевқа қарсы кездесу өткізеді

Қазақстандық аралас жекпе-жек майталманы Ержан Естанов алдағы Fights Nights Global 86 турнирінде Расул Мирзаевқа қарсы кездесуі алдында «Аралас жекпе-жек» каналына сұхбат беріп, дағыстандық спортшымен не үшін үшінші рет жекпе-жек өткізгісі келетінін айтты, – деп хабарлайды Qsport.kz порталы. 

Бразилиялық джиу-джитсу ережесі бойынша жұдырықтасатын отандасымыз әңгімесін үшінші рет жекпе-жекке не үшін шыққысы келетінінен бастады. 

«Бұл спорт, сондықтан бұл кездесу мен үшін маңызды. Расулмен үшінші рет шығатынымды естігенде көптеген адамдар мені балағаттап, не керегі бар дегендей әңгіме айтты. Көбісі Мирзаевтан ұтылғаннан кейін, дағыстандықтармен шығуды қою керек деп айтты. Бірақ спорттық мансабымда 9 рет шешен спортшысымен жұдырықтасып, тек бір-ақ рет ұтылып 8 кездесуде жеңіске жеткен болатынмын. Дағыстандық спортшылармен 5 рет жекпе-жек өткізіп, тек Мирзаевқа ғана ұтылғанмын. Бірақ Қазақстанда жеңгенімді емес, тек ұтылғанымды айтады. Иә, алдыңғы жекпе-жектерімде Расулға есе жіберіп қойдым. Бірақ екеуміздің тағыда жолымыздың түйісетінін сезіп жүрдім. Мирзаевпен бразилиялық джиу-джитсу ережесі бойынша жекпе-жек өткізу туралы ұсыныс түскенде бірден қабылдадым. Негізі, бұл кездесу спортты түсінетіндер үшін өте қызық болмақ. Өйткені бразилиялық джиу-джитсу ең тартысты спорттың бір түрі», – дейді Ержан.

Алдағы жоспарлары мен аралас жекпе-жектегі мақсаты туралы

«Көптеген жанкүйерлер мені аралас жекпе-жек спортынан көрінбей кеткенімді айтып жүр. Бұйыртса, осы додадан кейін Fights Nights Global  тұжырымымен келісімшартқа отырамын. Құдай қаласа, 61 келі салмақ дәрежесінде  Fights Nights Global  тұжырымы бойынша әлем чемпионы атанып, ұйым белбеуін иелену жоспарымызда бар. Бірақ бұл салмақта жұдырықтасатын мықты бауырларымыз да бар. Бәлкім, олар да чемпион атануы мүмкін», – дейді Ержан Естанов.

Айта кетейік, Fights Nights Global 86 додасы 1 сәуір күні, Алматы арена спорт кешенінде өтеді. Бұл доданың басты жекпе-жегі Жалғас Жұмағұлов пен Найсон Нэм арасында болады. Сондай-ақ бұл турнирде Ержан Естанов пен Расул Мирзаев бразилиялық джиу-джитсу бойынша жекпе-жек өткізетін болады.

Пікір жазу

Пікір жазу

Сіздің e-mail жарияланбайды. * толтыру міндетті орындар.

Ережесіз жекпе-жек